Shikangwa, Simba Queens hazikamatiki

20Apr 2023
Adam Fungamwango
Michezo
Nipashe
Shikangwa, Simba Queens hazikamatiki

WAKATI |Kocha Mkuu wa Simba Queens, Charles Lukula, amesema siri ya kuendelea kufanya vyema katika Ligi Kuu ya Soka ya Wanawake Tanzania ni uwapo kwa kikosi kipana, mshambuliaji wake, Jentrix Shikangwa, ameendelea kuzitikisa vyavu za wapinzani.

Kocha Mkuu wa Simba Queens, Charles Lukula.

Baada ya kupata ushindi wa mabao 4-0 dhidi ya Mkwawa Queens, Lukula alisema uamuzi wa kumpa kila mchezaji nafasi ya kucheza kunasaidia kuwapa mapumziko nyota wengine na kurejesha viwango vyao wanaporudi dimbani.

"Kila mtu anapata nafasi ya kucheza, wengine wanapumzika hata mechi mbili, ukiwarudisha tena uwanjani unaona viwango vyao vinakua vikubwa, msimu huu nimempa kila mchezaji nafasi ya kucheza, hata makipa wote watatu tumegawana mechi za kucheza," alisema Lukula.

Aliongeza ligi ya msimu huu bado ni ngumu na wamejipanga kuendelea kupambana kushinda kila mechi wanayocheza.

Katika mechi hiyo ya juzi, Mkenya Shikangwa alifikisha mabao 13 na kukaa kileleni baada ya kufunga magoli mawili, Vivian Corazone na Zainabu Mohamed, wakifunga pia.