Nape, Twanga Pepeta kunogesha pambano la Cheka Jumamosi

20Feb 2016
Somoe Ng'itu
Michezo
Nipashe
Nape, Twanga Pepeta kunogesha pambano la Cheka Jumamosi

WAZIRI wa Habari, Utamaduni, Sanaa na Michezo, Nape Nnauye, atakuwa mgeni katika pambano la kuwania ubingwa wa mabara wa WBF la uzani wa 'Super Middle' kati ya bondia Mtanzania Francis Cheka dhidi ya Gerad Ajetovic kutoka Serbia.

WAZIRI wa Habari, Utamaduni, Sanaa na Michezo, Nape Nnauye

Pambano hilo la raundi 12 litafanyika Jumamosi kwenye Viwanja vya Leaders jijini Dar es Salaam.

Akizungumza jijini jana, Meneja wa Cheka, Juma Ndambile, alisema maandalizi yote yamekamilika na Waziri Nape amekubali ombi la kuwa mgeni katika pambano hilo.

Ndambile alisema mpinzani wa Cheka atawasili nchini Jumatano huku wawakilishi wa Shirikisho la Ngumi la Dunia (WBF) ambao wataongozwa na rais wao, Goldberg Haward, watatua Alhamisi.

Aliongeza kuwa kabla ya pambano kuu, kutakuwa na mapambano ya utangulizi huku pia bendi ya African Stars 'Twanga Pepeta' ikitarajiwa kutoa burudani.

"Napenda pia kuwaambia mashabiki wa ngumu kuwa Cheka yuko 'fiti' na hajawahi kuwaangusha Watanzania akiwa hapa nyumbani," alisema.

Hii itakuwa ni mara ya pili kwa mabondia hapo kupigana baada ya mwaka 2008 kuzidunda nchini England na Cheka kupigwa kwa pointi.