Ligi Kuu Bara vumbi kutimka tena leo

09Apr 2016
Faustine Feliciane
Dar
Michezo
Nipashe
Ligi Kuu Bara vumbi kutimka tena leo

LIGI Kuu ya Soka Tanzania Bara inatarajia kuendelea leo katika viwanja vitatu tofauti, huku Kocha Mkuu wa Mwadui FC, Jamhuri Kihwelu 'Julio' akitamba 'kuilaza' wenyeji wake Ndanda FC katika mchezo utakaofanyika kwenye Uwanja wa Nangwanda Sijaona.

Kocha Mkuu wa Mwadui FC, Jamhuri Kihwelu 'Julio'.

Akizungumza na gazeti hili jana, Julio alisema kuwa hana hofu yoyote na Ndanda FC ambao katika mechi yao iliyopita 'waliwakamata' Azam FC na kutoka nao sare ya 2-2.

Julio alisema kuwa licha ya kucheza ugenini amewataka Ndanda FC wasitegemee mteremko katika mchezo huo.
"Mpira ni dakika tisini, lakini mimi nasema tumejiandaa na hatuna shaka na Ndanda, tutapambana kwenye uwanja wao kwa ajili ya kupata ushindi," alisema Julio.

Mechi nyingine zitakazofanyika leo ni kati ya African Sports dhidi ya Kagera Sugar kwenye Uwanja wa Mkwakwani mjini Tanga huku Mtibwa Sugar ikiwakaribisha Tanzania Prisons kwenye uwanja wa Manungu, Turiani mkoani Morogoro.