Kagera kulipa kisasi Mtibwa leo?

18Mar 2016
Sanula Athanas
Dar
Michezo
Nipashe
Kagera kulipa kisasi Mtibwa leo?
  • Timu hizo 'ndugu' zitachuana mjini Shinyanga katika mechi pekee ya leo ya Ligi Kuu Tanzania Bara.

KAGERA Sugar inayopambana kuukwepa mstari wa kuporomoka daraja, itakuwa na nafasi ya kulipa kisasi cha kufungwa bao 1-0 duru la kwanza na Mtibwa Sugar itakapowakabili 'Wakatamiwa wa Manungu' mjini Shinyanga leo jioni.

Kikosi cha kocha, Adolf Richard.

Mechi hiyo ya raundi 24 ya Ligi Kuu Tanzania Bara, itazikutanisha timu hizo ndugu kwenye Uwanja wa Kambarage.

Kikosi cha kocha mzawa Adolf Richard kitashuka uwanjani kikiwa na kumbukumbu ya kuibuka na ushindi wa mabao 3-0 katika mechi iliyopita dhidi ya Coastal Union.

Mtibwa inayonolewa na nahodha wa zamani wa Taifa Stars, Mecky Mexime, nayo ina rekodi nzuri ya kushinda mechi mbili zilizopita dhidi ya JKT Ruvu na Coastal Union.

Hata hivyo, vijana wa Mexime huenda wakakumbana na upinzani mkali kutoka kwa nyota wa Kagera ambao si tu kwamba wanahitaji kulipa kisasi cha kipigo cha Oktoba 28 cha bao 1-0 kwenye Uwanja wa Manungu, bali wanapambana kuhakikisha timu hiyo haishuki daraja.

Kagera kwa sasa iko nafasi ya 12 katika msimamo wa ligi ikiwa na mtaji wa pointi 22 baada ya mechi 23, wakati Mtibwa wanashika nafasi ya nne wakiwa na pointi 39 baada ya mechi 21.

MECHI TATU ZILIZOPITA

KAGERA
1. Kagera Sugar 3 - 0 Coastal Union
2. Tanzania Prisons 1 - 1 Kagera Sugar
3. Toto Africans 1 - 1 Kagera Sugar

MTIBWA
1. Mtibwa Sugar 2 - 1 JKT Ruvu
2. Mtibwa Sugar 3 - 0 Coastal Union
3. Majimaji 1 - 0 Mtibwa Sugar

Ligi hiyo itaendelea kesho kwa mechi mbili, vinara wa msimamo Simba wakiwa wageni wa Coastal Union kwenye Uwanja wa Mkwakwani jijini Tanga, wakati Majimaji watawakaribisha Mbeya City mjini Songea.

Stand United ambayo imepoteza mechi nne mfululizo, itakuwa na nafasi ya kurekebisha makosa itakapowaalika Ndanda FC mjini Shinyanga.