Bashungwa atoa siku 4 TANROADS kukagua barabara, madaraja

05Mar 2024
Na Mwandishi Wetu
Lindi
Habari
Nipashe
Bashungwa atoa siku 4 TANROADS kukagua barabara, madaraja

WAZIRI wa Ujenzi, Innocent Bashungwa ametoa siku nne kwa mameneja wa Wakala wa Barabara Tanzania (TANROADS) nchini kufanya tathmini na ukaguzi wa madaraja, makalavati na barabara kuu zote ambazo zimekuwa zikifanyiwa matengenezo ya mara kwa mara.

Waziri wa Ujenzi, Innocent Bashungwa (katikati) akikagua barabara iliyoharibika kutokana na mvua zinazoendelea kunyesha mkoani Lindi.

Amesema baada ya kufanyika kwa tathmini hiyo iwasilishwe taarifa hizo kwa wakuu wa mikoa ili ziweze kuchukuliwa hatua ya haraka.

Alitoa agizo hilo leo mkoani Lindi kutokana na taarifa ya Mamlaka ya Hali ya Hewa (TMA) kuhusu matokeo ya mvua zinazoendelea kunyesha katika maeneo mbalimbali na kuathiri miundombinu ya barabara, madaraja na makalvati kwa baadhi ya maeneo.

“Nielekeze hadi kufika Machi 9 mwaka huu kila meneja wa mkoa wa TANROADS na timu yake wakabidhi taarifa ya hali ya barabara na maeneo ya hatari yanayoweza kujitokeza katika madaraja na makalvati ili serikali iweze kuchukua hatua za haraka,” aliagiza Bashungwa.

Kadhalika aliwapongeza wakuu wa mikoa yote nchini kwa kuendelea kusimamia sekta ya ujenzi katika mikoa yao na kuwaomba kuimarisha ushirikiano katika kipindi hiki cha changamoto za mvua za El-Nino.

Pia aliiomba Wizara ya Fedha kuendelea kupeleka fedha za dharura katika mikoa yote ili mameneja wa TANROADS waweze kuendelea kuchukua hatua pale ambapo changamoto za mvua za El - Nino na mawasiliano ya barabara yanapokatika.

Aidha, Bashungwa alitoa pole kwa wananchi waliokwama katika eneo la Nangao ambapo sehemu ya daraja na makalvati katika Barabara ya Mtwara-Mingoyo-Masasi zimekatika na kufunga mawasiliano ya barabara kwa wananchi wa mikoa ya Lindi, Mtwara na Ruvuma kwa saa kadhaa.

Bashungwa aliwasihi wananchi kuendelea kuchukua tahadhari katika maeneo yao kama walivyotangaziwa na TMA pindi wanapoona maji mengi yanakatiza juu ya barabara na madaraja ili kulinda usalama wao na vyombo wanavyovitumia.

Mkuu wa Mkoa wa Lindi, Zainabu Telack, aliomba fedha za dharura za matengenezo ya barabara kufika kwa haraka ili ziweze kunusuru barabara zilizoathiriwa na mvua na zile zilizofunga hasa kwa wananchi wa Wilaya ya Liwale ambao wamekuwa kisiwani hawawezi kutoka wala kuingia.