Kinana: CCM tutampa Rais Samia awamu ya pili

03Jan 2024
Maulid Mmbaga
Ruangwa
Habari
Nipashe
Kinana: CCM tutampa Rais Samia awamu ya pili

MAKAMU Mwenyekiti wa Chama Cha Mapinduzi (CCM) Tanzania Bara, Abdulurhman Kinana amesema hakuna dhambi kwa kiongozi aliyeko madarakani anapomaliza awamu ya kwanza kupewa awamu ya pili aendelee kuongoza.

Akizungumza leo mbele ya wajumbe wa Mkutano Mkuu Maalumu wa CCM Wilaya ya Ruangwa mkoani Lindi, Kinana amesema Rais Samia anaonyesha njia kwa kupanga, kutafuta mikakati na kuweka vipaumbele na sasa Watanzania wanajivunia mafanikio.

Pia amebainisha kuwa wana CCM wanaposema mgombea waliyenaye anatosha kugombea mwaka 2025, hawana sababu yoyote zaidi ya kutambua mchango wake mkubwa katika taifa.

“Na Wana CCM si dhambi kusema fomu ya mgombea urais ni moja kama wanaridhika na kiongozi aliyeko madarakani. Pia CCM tuna utaratibu wetu kiongozi akichukua awamu ya kwanza anapewa kuongoza na awamu ya pili.

“Rais Samia yuko awamu ya kwanza, kwa nini asipewe awamu ya pili? Hakuna sababu ya kusema hapana. Kwa CCM kusema tumezingatia utaratibu wa chama chetu Rais anapomaliza kuongoza awamu ya kwanza anaingia ya pili,” amesema Kinana.