Yanga: Hatujafungiwa Fifa, majembe 'makali' yanakuja 

28Jun 2023
Adam Fungamwango
DAR ES SALAAM
Michezo
Nipashe
Yanga: Hatujafungiwa Fifa, majembe 'makali' yanakuja 

KLABU ya Yanga imekanusha taarifa zilizoanza kusambaa juzi jioni kwenye mitandao ya kijamii kuwa imefungiwa kusajili kutokana na kushindwa kumlipa kocha wake wa zamani, Luc Eymael, ikizielezea kuwa ni propaganda za watu walioshindwa huku ikiahidi kushusha majembe ya uhakika hivi karibuni.

Ofisa Habari na Mawasiliano wa klabu hiyo, Ali Kamwe, amesema walikiri kupokea barua ya kumlipa kocha huyo tangu Machi, mwaka huu na waliitolea ufafanuzi, huku kocha mwenyewe akithibitisha hilo, lakini anashangaa zilipotokea taarifa hizo juzi.

"Hizi ni taarifa za uongo, hatujafungiwa na FIFA, hizi ni propaganda za watu walioshindwa, nawataka wanachama na mashabiki wa Yanga kuzipuuza, wasiyumbishwe na maneno yasiyo ya kweli, taarifa kamili za klabu zitatolewa na vyombo vya klabu yenyewe," alisema Kamwe.

Katika kusisitiza kuwa hazikuwa taarifa za ukweli, alisema hazipo kwenye kurasa za Shirikisho la Kimataifa la Soka (Fifa), hususan kwenye kitengo kinachoshughulikia suala hilo, ambapo kama zingekuwa sahihi zilitakiwa zianzie huko na kusambaa, siyo zionekane tu kwenye mitandao ya kijamii.

Hata hivyo, alikiri kuwa wanadaiwa na kocha huyo na walishaliweka suala hilo bayana, lakini kuhusu kumlipa, alisema si jambo la busara kuliweka hadharani.

"Tulikiri kupokea barua ya Fifa na makubaliano ilikuwa ni kumlipa kwa awamu, tukasema tunalifanyia kazi, ila siwezi kuja hadharani kueleza nini kinaendelea kwenye makubaliano haya ambayo yanafanyiwa kazi, haya ni mambo ya taasisi kwenda kwa mhusika mwenyewe, tunawaomba tu wanachama na mashabiki wa Yanga kuwa watulivu. 

"Tuko kwenye maandalizi ya msimu unaokuja, sasa hivi viongozi wanajiandaa kutoa jezi za msimu unaokuja, kutambulisha wachezaji wapya tunaowasajili kwa sababu hatujafungiwa na kuandaa 'pre season' kama unavyofahamu tutacheza mechi za Ngao ya Jamii mapema sana mwezi wa nane na safari hii zitachezwa kama ligi pamoja na Tamasha la Wiki ya Mwananchi," Kamwe alizidi kufafanua.

Kocha huyo raia wa Ubelgiji aliifundisha Yanga kuanzia Januari 2020 hadi Julai mwaka huo alipotimuliwa kwa madai ya kutoa maneno ya kibaguzi.

Tangu wakati huo kocha huyo amenukuliwa akidai anaidai klabu hiyo, ambapo Machi mwaka huu ziliibuka taarifa kama hizi za Yanga kufungiwa madirisha matatu ya usajili, lakini mwenye Eymael aliibuka na kukiri anadai na kukanusha kuwa klabu hiyo imefungiwa.

"Nadhani walioandika taarifa hiyo wameripoti kinyume, tumejulishwa kwamba Yanga wanatakiwa kunilipa stahiki zangu ndani ya siku 45 na iwapo wakishindwa kufanya hivyo kuna adhabu kubwa, ila hawajafungiwa kusajili, wamejulishwa uamuzi wa kutakiwa kunilipa fedha zangu," alisema Eymael Machi mwaka huu.