Mbeya City wahofu joto Tanga wakiikabili African Sports leo

14Mar 2016
Sanula Athanas
Dar
Michezo
Nipashe
Mbeya City wahofu joto Tanga wakiikabili African Sports leo
  • Kabla ya mechi za jana, timu hiyo ya Mbeya ilikuwa inashika nafasi ya tisa kwenye msimamo wa ligi ya Bara ikiwa na mtaji wa pointi 24 baada ya mechi 22, ikishinda sita na kupoteza 10.

KIKOSI cha Mbeya City kinashuka kwenye Uwanja wa Mkwakwani jijini Tanga leo jioni kuikabili African Sports katika mechi pekee ya leo ya Ligi Kuu Tanzania Bara, huku kocha mkuu wa City, Kinnah Phiri, akihofia hali ya hewa ya jiji hilo.

Kikosi cha Mbeya City.

Mkuu wa Kitengo cha Utabibu wa City, Joshua Kaseko, alisema jana kuwa wachezaji wote 18 waliosafiri kutoka Mbeya hadi Tanga wako tayari kwa mechi hiyo ya raundi ya 23.

“Joseph Mahundi alipata majeraha kwenye mchezo uliopita (dhidi ya Stand United). Sasa yuko vizuri na tunatarajia atakuwa sehemu ya kikosi hapo kesho (leo)," alisema.

Kocha mkuu wa City (Phiri), alisema jana kuwa hali ya hewa ya jiji la Tanga si rafiki kwa nyota wake waliozoea baridi la Mbeya, lakini hataki kuifanya sababu kwa timu yake kupoteza pambano kabla ya kucheza.

“Hali ya hewa ya hapa ni tofauti sana na Mbeya, lakini hilo hatulitizami sana, tumejiandaa vya kutosha, asubuhi ya leo (jana) tumemaliza mazoezi na wachezaji wamepewa muda wa kuweka miili yao sawa kwa kuoga kwenye barafu, hakuna shaka yoyote kuwa tunazo pointi tatu hapa,” Phiri alikaririwa na mtandao rasmi wa City jana.