Watakaojifungua watoto njiti kuongezewa muda wa likizo

Akizungumza Jana mara baada ya kusainiwa kwa Mkataba huo, Katibu Mkuu wa TUGHE Taifa, Cde. Hery Mkunda alisema kuwa kwa mara ya kwanza mkataba umeongeza idadi ya siku ya likizo kwa mfanyakazi mwanamke atakayejifungua mtoto njiti na kufanya TUGHE kuwa chama cha kwanza kuweka kipengele hicho katika Mkataba wake wa Hali Bora.

Cde. Mkunda alisema kuwa lengo la kuboresha kipengele hicho ni kutambua na kuthamini mchango mkubwa unaofanywa na Wanawake ndani ya TUGHE hivyo kwa kufanya hivyo kutaongeza tija na ufanisi ndani ya chama.

Aidha aliiomba serikali kupitia upya na kuboresha sera na sheria mbalimbali zitakazojumuisha wanawake wanaojifungua watoto njiti kama ambavyo TUGHE wameanza kufanya ili kuwapatia muda wa kuwahudumia Watoto pamoja na kuimarisha afya zao. 

Kwa upande wake Mgeni Rasmi  Makamu Mwnyekiti wa TUGHE Taifa, Dk. Jane Madete alieleza kuwa amefurahishwa na uamuzi huo wa kufikia makubaliano hayo kati ya Uongozi na wafanyakazi kwani utaenda kuongeza ari ya kufanya kazi kwa bidii na kukifanya Chama kipige hatua mbele zaidi.

Nao Viongozi wa Tawi la TUGHE kwa niaba ya Wafanyakazi walisema kuwa wamefurahishwa na mkataba huo kwani umegusa maeneo yote muhimu ambayo kwa muda mrefu walikuwa wanaomba uongozi uweze kufanya maboresho. 

Mkataba huo uliosaniwa ni wa muda wa miaka mitatu na una kipengele cha kufanyika kwa marekebisho muda wowote ambapo pande zote mbili zitaona kuna uhitaji wa kufanya hivyo. Pia Mkataba huo utawahusu Wafanyakazi wote walio katika Ajira ya kudumu na zile za mikataba ya muda maalumu na Chama.