Wananchi 150,000 kuchunguzwa macho Singida, Dodoma na Morogoro

27Aug 2023
Thobias Mwanakatwe
Singida
Habari
Nipashe Jumapili
Wananchi 150,000 kuchunguzwa macho Singida, Dodoma na Morogoro

WANANCHI 150,000 katika mikoa ya Singida, Morogoro na Dodoma watapatiwa huduma ya uchunguzi wa magonjwa ya macho baada ya shirika lisilo la kiserikali la Sightsavers kuzindua mradi mpya utakaojulikana kama Macho Yangu utakaotekelezwa katika mikoa hiyo.

Mkurugenzi Mkuu wa shirika hilo, Godwin Kabalika akizungumza wakati wa kikao cha kutambulisha mradi huo kilichofanyika mjini Singida na kuwashirikisha, amesema wananchi wengine 15,000 watafanyiwa upasuaji wa mtoto wa jicho na 15,000 watapewa miwani ya macho.

Naye Mratibu wa Mradi wa Macho Yangu Mkoa wa Singida, Upendo Minja, amesema kwa mkoa huu wananchi 50,000 watafanyiwa uchunguzi wa huduma za macho, 5,000 watafanyiwa upasuaji wa mtoto wa jicho na wengine 5,000 watapewa miwani katika kipindi cha miaka minne ya utekelezaji wa mradi huo.

Kwa upande wake Mratibu wa Huduma za Macho Mkoa wa Singida, Upendo Mwakabalile amesema mradi wa Boresha Macho ambao umekwisha umekuwa na mafanikio makubwa katika utoaji wa huduma za macho kwa wananchi ulijiwekea lengo la kuwafanyia upasuaji wa mtoto wa jicho watu 5,625 lakini hadi mwisho wa mradi wamefanyiwa watu 7,995 na hivyo kuvuka lengo lililokuwa limewekwa.