Upelelezi haujakamilika kesi usafirishaji dawa za kulevya

05Feb 2024
Imani Nathaniel
Habari
Nipashe
Upelelezi haujakamilika kesi usafirishaji dawa za kulevya

UPANDE wa mashtaka katika kesi ya uhujumu  uchumi ya mfanyabiashara, Hemed Mrisho, umedai kuwa  bado haujakamilisha upelelezi katika kesi hiyo ya  usafirishaji wa dawa za kulevya.

Hemed Mrisho.

Wakili wa serikali Happyness Mwakanyamale amesema kuwa hayo leo katika mahakama ya Hakimu mkazi Kisutu Dar es Salaam wakati kesi hiyo, ilipotajwa.

Mbele ya Hakimu Mkazi Mkuu Ushindi Swalo, wakili huyo amesema kuwa  bado wanaendelea na upelelezi wa kesi hiyo hivyo aliiomba mahakama ipange tarehe nyingine ya kutajwa ambapo ilipangwa Februari 19 mwaka huu.

Katika kesi hiyo, Mrisho ambaye ni mkazi wa Boko, Tegeta, anadaiwa kutenda kosa hilo Oktoba 31 mwaka 2023 eneo la Boko Magengeni.

Ilidaiwa kuwa, akiwa eneo hilo alikamatwa akisafirisha dawa za kulevya ,Cocaine gramu 326.46.