Dk. Mpango kufungua mkutano wa ajira, Mataifa 50 Afrika kushiriki

31Jan 2024
Frank Monyo
DAR ES SALAAM
Habari
Nipashe
Dk. Mpango kufungua mkutano wa ajira, Mataifa 50 Afrika kushiriki

Makamu wa Rais Dk. Philip Mpango anatarajiwa kufungua Mkutano wa saba wa Washirika wa Kijamii wa Afrika utakaofanyika Februari 7, hadi 8 Dar es Salaam ambapo Mataifa 50 kutoka Afrika yanatarajiwa kushiriki.

Mkurugenzi Mtendaji na Afisa Mtendaji Mkuu Chama Cha Waajiri Tanzania (ATE), Suzanne Ndomba-Doran.

Akitoa taarifa hiyo leo mbele ya wanahabari, Mkurugenzi Mtendaji na Afisa Mtendaji Mkuu Chama Cha Waajiri Tanzania (ATE), Suzanne Ndomba-Doran, amesema kuwa maandalizi ya mkutano huo yamekamilika kwa kiasi kikubwa na kueleza kuwa mkutano huo ni muhimu kwa Tanzania na Afrika kwa ajili ya kujadili masuala mtambuka kama ukuaji wa teknolojia na mstakabali wa ajira.

“Tutakuwa na mambo mengi, muhimu ni pamoja na uendelezaji wa ujuzi, ukuwaji wa viwanda na uuundaji wa ajira barani Afrika,” amesema.

Amesema kuwa ushirikiano wa pamoja na Shirika la Waajiri la Kimataifa (IOE), kwa msaada kutoka Jumuiya ya Ulaya (EU), Business Africa, na ATE utafanikisha mkutano huo ambapo ATE ni mwenyeji.

"Mkutano wa Washirika wa Kijamii wa Kiafrika (ASP), chini ya uongozi wa Waajiri, ni mkutano na jukwaa la wadau muhimu kutoka sekta mbalimbali kukutana, kufuatilia maendeleo na changamoto za upatikanaji wa ajira kote Barani Afrika," amesema 

Amesema kuwa ni mara ya kwanza mkutano huo kufanyika Afrika Mashariki na mara ya pili kufanyika katika nchi inayozungumza lugha Kiingereza, Mkutano wa Washirika wa Kijamii wa Kiafrika ulifanyika mwaka 2020 Lagos.

Suzzane amewataja wasemaji katika mkutano huo kuwa ni Naibu Mkurugenzi Mkuu, Shirika la Kazi la Kimataifa (ILO), Fanfan Rwanyindo Kayirangwa, Katibu Mkuu, Shirika la Waajiri la Kimataifa (IOE), Roberto Suarez Santos.

Amesema kuwa washiriki wa mkutano huo watapitia mada muhimu kama mustakabali wa kazi, digitali, maendeleo ya ujuzi wa Akili Bandia (AI), viwanda, na sekta zinazochangia upatikanaji Afrika. Pia itatoa fursa ya kipekee ya kupata ufahamu wa maendeleo ya sasa, kushirikiana nyenzo za utandaji bora wa ujuzi, utendaji bora na kutambua mikakati yenye ufanisi kwa ukuaji endelevu na maendeleo endelevu.

"Licha ya utajiri uliopo, nchi nyingi za Kiafrika zinakabiliana na changamoto kama viwango vya juu vya ukosefu wa ajira, kutokuwa uwiano wa mapato, viwango vikubwa vya ajira isiyo rasmi, uzalishaji mdogo, na mifumo duni ya ulinzi wa kijamii. Viwango vya ukuaji vilivyoinuka barani Afrika kabla ya janga la Covid-19 havikuwa na matokeo mazuri hasa kwa wanawake na vijana." amesema 

Ameongeza kuwa Ripoti kutoka ILO inaonyesha kuwa zaidi ya vijana milioni 72 barani Afrika hawapo katika mfumo wa elimu au mafunzo na hawana ajira, wengi wao ni wanawake vijana. Kushughulikia ukosefu wa shughuli za vijana na kutokubaliana kwa jinsia ni muhimu kufikia Lengo la Maendeleo Endelevu namba nane (8) kuhusu kazi bora kwa wote ifikapo mwaka 2030.

"Sekta isiyo rasmi inaendelea kudhibiti uchumi wa Afrika, na karibu asilimia 85.5 ya ajira barani humo inachukuliwa kama ajira isiyo rasmi. Hali hii inazuia upatikanaji wa ustawi, ulinzi wa kijamii na mazingira bora ya kufanyia kazi kwa mamilioni ya wafanyakazi." amesema na kuongeza kuwa;

"Kuna haja ya haraka kuendelea kuzingatia uumbaji wa ajira, maendeleo ya ujuzi, na biashara endelevu ili kuhakikisha ukuaji wenye tija na uthabiti wa kijamii. Shirika la Waajiri la Kimataifa (IOE) pamoja na wanachama wake, ikiwemo Tanzania na washirika, wanafanya kazi kwa bidii kutatua changamoto hizi kupitia mipango kama Mkataba wa Washirika wa Kijamii wa Kiafrika juu Uumbaji wa Ajira barani Afrika (Blueprint for Jobs in Africa)," amesema.