Benki ya NBC yaiwezesha Zanzibar mkopo wa sh. bilioni 470

17Jul 2023
Na Mwandishi Wetu
ZANZIBAR
Biashara
Nipashe
Benki ya NBC yaiwezesha Zanzibar mkopo wa sh. bilioni 470

Benki ya Taifa ya Biashara (NBC) imetangaza kukamilika kwa taratibu ambazo zimewezesha Serikali ya Mapinduzi Zanzibar (SMZ) kupata mkopo wa Dola za Kimarekani milioni 200 sawa na shilingi za kitanzania bilioni 470. 

Rais wa Zanzibar, Dk. Hussein Mwinyi (katikati), akishuhudia utiaji saini wa mkataba wa mkopo wa ushirikiano wenye thamani ya dola milioni 200 kati ya Mkurugenzi Mtendaji wa Benki ya NBC, Theobald Sabi (kushoto) na Katibu Mkuu Wizara ya Miundombinu na Mawasiliano, Dk. Juma Malik Akili (kulia) uliofanyika jana Unguja. PICHA: MPIGAPICHA WETU

NBC benki ni mwezeshaji mkuu ikishirikiana na Benki ya NMB kama mkopeshaji mwenza katika kufanikisha upatikanaji wa mkopo huu mkubwa kwa Zanzibar.

Mkurugenzi Mtendaji wa NBC, Theobald Sabi, alisema benki hiyo inafurahi kuweza kusaidia upatikanaji wa mkopo huo utakaosaidia SMZ kufikia malengo yake ya ukuaji wa uchumi na maendeleo jumuishi.

Alisema fedha zinazotokana na mkopo huo zitasaidia kutekeleza miradi mbalimbali ya kijamii pamoja na miundo mbinu malengo yakiwa ni kuboresha maisha na hali ya kiuchumi kwa Wazanzibari.

"Huu ni ushirikianao wa aina yake ambapo Benki ya NBC imeweza kufanya kazi na  SMZ katika jitihada za kufanikisha miradi ya maendeleo kwa ustawi wa wananchi wa Zanzibar," alisema Sabi.

Sabi, alisema mkopo huo ni hatua kubwa na muhimu katika kushirikiana pamoja kwenye malengo ya maendeleo endelevu na kuboesha maisha ya wananchi wa kisiwa cha Zanzibar.

Mkurugenzi huyo aliongeza kuwa NBC itaendelea kuwa mstari wa mbele katika kusaidia jitihada za kuleta maendeleo ya kiuchumi kupitia huduma za kifedha.

Rais wa Zanzibar Dk. Hussein Ally Mwinyi alishukuru benki ya NBC kwa kuweza kufanikisha mkopo huo ambao alisema utakuwa na mchango mkubwa katika kufadhili miradi ya maendeleo Zanzibar na hivyo kukifanya kisiwa hicho kufikia malengo yake ya kuboresha maisha ya wananchi wake kwenye njanja za  kijamii na kiuchumi.

Dkt. Mwinyi alitaja baadhi ya maeneo ambayo yatanufaika na fedha hizo kuwa ni huduma za kiafya, elimu, miundo mbinu ya usafiri, na miradi ya maendeleo ya kijamii.

“Kwa kuwekeza kwenye sekta hizi muhimu SMZ inalenga kuboresha maisha ya wananchi wake na kuongeza wigo wa upatikanaji wa huduma muhimu za kijamii na kuwezesha kufikia malengo ya muda mrefu ya maendeleo ya kiuchumi,” alifafanua