Mgomo Kariakoo ulivyoibua ari ya kukutana na Waziri Mkuu

Kilichosikika Kariakoo ni sehemu ndogo ya vilio na malalamiko mengi ya jumuiya mbalimbali za Watanzania ambao wana kero nyingi wanazotamani kuzitoa. Mfano kuna wasafirishaji kuanzia daladala hadi malori  ya shehena, hawa wanapoanza siku  kila hatua wanayotembea ni mkono, unaotaka kitu kidogo.

Wapo wawekezaji binafsi kwenye huduma za afya maabara, zahanati na hospitali na pia wapo  waliojitumbukiza kwenye elimu wakijenga  shule za msingi, sekondari  vyuo na vyuo vikuu wana vilio vyao ni kilio cha vikwazo, kodi, tozo na ada.

VIJIJINI WAPO

Baadhi ya watu wanaotamani kukutana na Waziri Mkuu, Kassimu Majaliwa ni wakazi wa Kitongoji cha  Kambulwa wakulima na wafugaji takribani 400, ambao wanaishi Kwamgome wilayani Handeni mkoani Tanga.

Wanacholia ni njaa, hawajalima masika wala vuli tangu mwaka jana baada ya ardhi yao kutwaliwa na serikali ili kuchimba kifusi, kokoto na mchanga kwa ajili ya ujenzi wa barabar a kutoka Handeni hadi Dodoma, ikipitia Manyara, Singida hadi Dodoma.

Wanapofika kwenye ofisi za  Nipashe wanasema: “ Sisi wananchi wa Kwamgome  ni  wafugaji na wakulima  tunaolima eneo la  Kambulwa, lakini maeneo yetu yamechukuliwa  na Halmashauri  ya Mji – Handeni kwa ajili ya kambi ya ujenzi, machimbo  ya mawe, kifusi  na kokoto za ujenzi  wa barabara  za  kitaifa.” Wanasema katika waraka wanaouwasilisha.

Waraka wao kwa Waziri Mkuu una malalamiko ya watu 22 wenye sahihi zao wakieleza kuwa Oktoba  16, 2022  walimwandikia Mkurugenzi wa Mji  Handeni  pamoja na Waziri wa Nchi Ofisi ya Rais TAMISEMI, Mkuu wa Mkoa Tanga  na mbunge wa Handeni  Mjini kuhusu  malipo ya maeneo yao.

Wanasema ni sehemu wanayoitegemea  kwa  kilimo, makazi  na ufugaji,  wakihoji wanalipwaje kwa kuwa hawana sehemu   ya kuishi, kufuga  na  kulima  kwa ajili ya kupata chakula   na kwamba muda wa kilimo tayari  umepita  wa vuli na  masika na tayari ni miaka miwili sasa.

Wanasema katika barua yao kwa Waziri Mkuu Majaliwa, aliyoambatanisha na majina 22 ya wakalalamikaji, ambayo Nipashe ina nakala yake.

Wanaongeza kuwa maeneo yao yalishapimwa kisheria  na kufanyiwa tathmini  ya ardhi na  hati wanazo  kama sheria hiyo inavyotaka na kwamba tathmini  ilifanyika  Juni 16, 2022 na sasa  ni karibu mwaka umepita.

Wanasema kuanzia Novemba 2022  uongozi wa  mkoa umewapa  maelekezo ya kutafuta maeneo mengine wanunue  na kwamba watalipwa. Hofu yao ni kwamba muda umeshapita, lakini leo hakuna majibu wala mawasiliano  yoyote na serikali  wakilalamika kuwa hawana sehemu  za  kuishi au makazi , malisho ya mifugo na kilimo na kuhoji wataishije?

Wanachotaka kwa Waziri Mkuu  na  serikali  ni  kujua  msimamo wa  serikali  kuhusu malipo  yao, wakihoji watalipwa  lini?  Wanashangaa kuona kampuni iko ‘saiti’ inachimba mawe, kifusi, kokoto na mchanga lakini hawajalipwa fidia inakuwaje?

Wanawageukia Mkuu wa Mkoa wa Tanga, Mkuu wa Wilaya na Mkurugenzi  wa  Mji  Handeni  mbona wako  kimya   bila kuwaeleza  kuna tatizo gani? Watendaji wa Wakala wa Barabara (TANROADS)  Taifa na Mkoa kwa vile mradi  huo umechukua  makazi yao wangeongea nao lakini wote wamekaa kimya.

Katika barua ya malalamiko wakulima hao na wafugaji  22 wanasema kilichotokea kwa wafanyabiashara wa Kariakoo kitoe funzo viongozi wa serikali wahudumie na kujali wananchi hasa maskini ambao wanaoitegemea na kuiamini serikali kwa kila jambo.

UTETEZI WA VIONGOZI

Zafarani Madayi  ni Meneja wa Mazingira na Jamii TANROADS Taifa, anapoulizwa kuhusu madai ya wakazi wa Kwamgome, kuwa kampuni ya ujenzi (jina tunalo) imeshaingia kazini bila kuwalipa wananchi ambao ardhi imechukuliwa, anasema sheria zikifuatwa hakutakuwa na kulalamika.

Utaratibu na sheria unaelekeza kuwa kabla ya mkandarasi kuingia kwenye eneo  kuchukua kifusi au kuanza kazi ni lazima awasiliane na uongozi  wa eneo na awatambue wamiliki , waonyeshe mipaka yao, uthamini ufanyike, walipwe kisheria na wakubali kutoa maeneo yao yachimbwe mawe, mchanga, kokoto  na kabla ya kufanya hayo sheria hairuhusu.

Zafarani anasema wanacholipiwa ni fidia ya ardhi na  mazao na kwamba kama hawajapata haki yao waende TANROADS Mkoa wa Tanga, maana ina  taarifa zote za barabara miradi mkubwa kwa midogo. Anawashauri kumchagua mwakilishi siyo waende kundi la watu 400 na baadhi ya vitu wanavyotakiwa kwenda navyo ni barua ya Mwenyekiti wa Serikali za Mitaa au Kijiji au  viongozi wa kata kuwathibitisha.

“Hata hivyo, wafuatilie na kujiridhisha  kwanza kufahamu iwapo ardhi ni mali yao au ya kijiji maana kama ni ya kijiji hawatafidiwa badala yake halmashauri inayohusika italipwa mrahaba.” Anasema Zafarani.

TANGA YAWASHANGAA

Ofisi ya Meneja wa TANROADS Tanga, inakiri kuwa ardhi ya kitongoji cha Kambulwa imechukuliwa kwa ajili ya kupata kokoto, mchanga, mawe na kifusi kwa ajili ya ujenzi wa barabara  ya kilometa takribani 430 kuanzia Handeni kipita mikoa ya Manyara-Singida na Dodoma.

Hata hivyo, inawashangaa mbona hawajafikisha malalamiko yao ofisini humo? Inawakaribisha  kwa Meneja wa Mkoa, wasilalamike wafike TANROADS na watapata majibu ya maswali yao na kwamba tangu kutangazwa hatua za kuchukuliwa eneo hilo hawajawasilisha malalamiko ofisi ya mkoa huo, anasema Meneja wa Mkoa, Eliazary Rweikiza.

Anawatoa hofu kuwa wamehamishwa eneo hilo, ili kuwalinda wasije kuumizwa na milipuko ya mawe na kwamba ni jambo linalofahamika hivyo wafike ofisi ya mkoa na watapatiwa majibu ya maswali yao anasema Rweikiza.